خلينا نتكلم شوية عن غسالات الأطباق زي مثلا الحاجات الأساسية اللي لازم تكون عارفها لو لسه هتشتري غسالة أطباق جديدة أو لو عندك واحدة أصلا بس حابب تعرف أكتر عن الاستهلاك والاستخدام عشان تستغلها صح.
هنتكلم عن 5 حاجات:
- العرض
- السعة
- استهلاك الكهرباء والمياه
- برنامج توفير الطاقة (ECO)
- صوت الغسالة
1. العرض
45 سم
لو مطبخك ضيق أو لو أسرتك صغيرة واطباقكم مش كتير يبقى الأنسب لك تجيب غسالة أطباق
عرضها 45 سم فتوفرلك مجهود كبير و في نفس الوقت ماتخدش مساحة كبيرة
60 سم
لكن لو أسرتك كبيرة أو استخدامكم عالي يبقى الانسب غسالة بعرض 60 سم عشان تستوعب
اطباق وكوبايات أكتر
طبعا دي هتاخد شوية من مساحة من المطبخ لكن هتكون عملية ومريحة.
2. السعة
لكن في نقطة مهمة وهي ان مش كل الغسالات ال45 سم أو 60 سم زي بعض. وده لأن سعة كل غسالة
وتقسيمتها من جوه مختلفة عن التانية وهتلاقي سعة الغسالات بتتقاس بعدد الاشخاص.
فمثلا لو هتجيب غسالة 45 سم يبقى أتوقع تقريبا انها تشيل مستلزمات من 8-10 أفراد.
أما غسالات ال60 سم فبتستوعب استخدام 12-16 شخص. وده برضه على حسب كل غسالة.
حسبة الشخص الواحد تقريبا بتكون قد ايه؟
- طبق مسطح كبير و طبق تاني صغير
- طبق شوربة
- فنجان شاي وطبقه
- كوباية عادية
- أدوات الطعام للفرد
3. استهلاك الكهرباء والمياه
بالنسبة بقى للأستخدام
برامج الغسل العادية بتعتمد على درجات حرارة عالية عشان تنضف أحسن وأسرع وتجفف
بقدرة أعلى، ولكن المشكلة ان التسخين بيستهلك كمية مياه وطاقة عالية ، فبالتالي ممكن
يعلي عليك فاتورة الكهرباء والمياه. فهل في حل موفر شوية؟
4. وضع/برنامج توفير الطاقة (ECO)
في برنامج موجود في بعض غسالات الاطباق بيساعدك انك توفر 30% من فاتورتك بدلا
من البرامج العادية اللي بتستهلك كتير. البرنامج مناسب لو الاطباق مش متسخة بشكل
كبير جدا فمش محتاج تسخين عالي.
طيب ازاي بتوفر طاقة؟
مدة الغسل بتكون أطول ولكن حرارة المياه بتكون أقل من العادي وده اللي بيقلل من الاستهلاك.
5.صوت الغسالة
أكيد حاجة مش مريحة خالص أنك تشتري غسالة تكون عملالك ازعاج في البيت .
وانت بتشتري شوف مستوى الضوضاء للغسالة وحدد اذا كان ده اللي هتستحمله ولا لأ.
مستوى الازعاج بيتقاس بالديسيبل، وده تبسيط لمستويات الضوضاء وتأثيرها المتوقع عليك.
- من منتصف ال 50 ديسيبل فما فوق بتسبب ضوضاء العالية
- من منتصف ال 40 ديسيبل ضوضاء متوسطة/عادية
- لو مستوى الضوضاء أقل من منتصف ال40 ديسيبل اتوقع أقل مستوى من الضوضاء
انتظروا الجزء التاني اللي هنتكلم فيه عن تصنيفات الطاقة ونشرح بعض البرامج الجديدة! 🙂