ستات البيوت ربنا يخليهم لينا عارفين ان عمايل الأكل والشرب والتقديم ليه أصول . يعني مثلا قوام صلصة طماطم بيختلف عن صوص الريحان ومش هيتضربوا بنفس السرعة ولا نفس المدة

عشان كدة وانت بشتري خلاط لازم تكون عارف كل حاجة فيه وفائدتها ايه

لو لسه هتشتري خلاط وبتقارن ما بين واحد عادي وواحد فيه سرعة النبضات وعايز تعرف يستاهل ولا لأ يبقى كمل قراءة  ولو لسه مكتشف ان  الخلاط اللي عندك فيه الزرار دا ومش عارف لازمته ايه يبقى كمل برضه 

 Pulseايه هي خاصية النبضات في الخلاطات؟ أو زرار البالس 

في زرار كدة في بعض الخلاطات مكتوب عليه  Pulse و أحيانا بيتكب حرف P وناس كتير مش فاهمة بيعمل ايه.

بكل بساطة هو زرار بيخليك تتحكم و تحافظ على قوام المزيج أكتر ويسهلك الخلط

 ايه اللي بيحصل يعني لما بتدوس عليه؟

 

 لما تدوس على زرار البالس الخلاط بيشتغل بأقصى سرعة طول ما انت دايس وبيقف مرة واحدة لو سبته،طيب ما انت ممكن  تدوس على زرار أعلى سرعة وتوقف وقت ما تحب! مش صعبة يعني!بس أكيد مصممين الخلاطات عاملين الزرار دا لسبب ولا ايه؟

الفرق بين سرعة النبضات وبين زرار أعلى سرعة

اه انت ممكن تحاول تعمل كده بس صعب تضبط معاك بالذات لو عايز شكل وثقل معين للمزيج. زرار أعلى سرعة أول ما هتدوس عليه هيفضل شغال لوحده لحد ما انت توقفه. فممكن جدا الصلصة أو العصير او اللي بتضربه يتضرب زيادة عن اللزوم ويبوظ أو يسيب منك

لكن خاصية النبضات مش بتشتغل الا لو انت دايس وأول مترفع ايدك بتفصل في لحظتها والكام ثانية دول هما اللي بينقذوا السائل انه يفقد ثقله 

ايه المختلف كمان في البالس؟ ولا هو اخره كدة وبس؟

لو عندك ضيوف مثلا وشايل مانجة في الفريزر وعايز تعمل عصير مانجة مش لازم تستنى لحد متفك وطبعا غلط انك تضربها على طول عشان ممكن الخلاط يبوظ وهتفضل  الفاكهة جامدة في الاخر

في الحالة دي تستخدم البالس لأنه متخصص انه يضرب الحاجات الجامدة والمثلجة فبيطريها بسهولة ومن غير ما يرهق الموتور 

هديلك مثال

 لو أنت عايز تضرب صلصة ريحان بس تحافظ على انها تبقى ثقيلة شوية أو طماطم وفيها قطع طماطم أو بصل صغيرة يبقى الزرار ده هو اللي هيعملك كدة بسهولة

طيب انت عرفت كدة البالس بيعمل ايه، لسه برضه مش عارف ممكن تستخدمه في ايه تاني؟

يبقى اقرأ المقالة الجاية عن 4 استخدامات لخاصية أو سرعة النبضات