المقالة دي بتجاوب على بعض الأسئلة اللي ممكن تيجي عل بالك وانت بشتري غسالة
1. ازاي تحدد حجم الغسالة المناسبة ليك؟
ده بيعتمد على حاجتين: حجم أسرتك وهتغسل كام مرة في الاسبوع.
لو بتحب تجمع غسيل الاسبوع على مرة واحدة ولو بتغسل لحاف ، مخدات أو قطع كبيرة يبقى غسالاتك لازم تكون كبيرة. وده تقريب لحجم الغسالة المناسب لحجم كل أسرة.
2. ايه هي انواع الغسالات الاساسية؟
الغسالات الفول اتوماتيك نوعين:
غسالة تحميل علوي وغسالة تحميل أمامي.
غسالة تحميل علوي
الغسالة بتتفتح من فوق فمش هتحتاج تتني ظهرك وأنت بتملاها. سعر الغسالات دي بيكون أقل من التحميل الامامي لأن فيها محركات هزازة أو مراوح دافعة بتاخد مساحة كبيرة وده بيقلل من سعتها الفعلية.
غسالة تحميل امامي
باب الغسالة أمامي وبتشتغل بتقنية الدوران بدل من المحركات الهزازة فمفيش هدر في السعة وكمان هي موفرة أكتر للطاقة.
3. ليه عدد اللفات في الدقيقة مهم؟
قوة وسرعة التجفيف في الغسالة مهم جدا وده بيتقاس بعدد اللفات في الدقيقة، وكل ما زاد عدد اللفات كل ما كان التجفيف أحسن وأسرع. هتلاقي معظم الغسالات ما بين 1000 إلى 1800 لفة في الدقيقة.
طيب ازاي تحدد سرعة اللف اللي انت عايزها؟
لو معظم الغسيل اقمشة ثقيلة يبقى هتحتاج سرعة لف عالية. لكن عموما سرعات اللف المعقولة بتكون ما بين 1200 إلى 1400 لفة في الدقيقة.
4. ازاي تختار غسالة موفرة للطاقة؟
كفاءة الغسالة في استهلاك الطاقة والمياه مهمة جدا عشان ماتدفعش فواتير غالية على الفاضي . الغسالات الموفرة ليها تصنيفات من A لحد A+++ . كل ما قربت من ِ A+++ كل ما كانت الغسالة موفرة.
5. اتوقع حجم الغسالة يكون قد ايه؟
ده متوسط احجام الغسالات
- الارتفاع 85 سم
- العرض 70 سم
- العمق ما بين 40 إلى 70 سم
6. ايه هي المقاسات اللي لازم اعرفها؟
لما تيجي تحسب المقاسات عشان تتأكد ان الغسالة هتكفي المكان اللي انت اخترته، انت مش بس هتقيس ارتفاع وعرض وعمق المكان ، لازم تاخد في اعتبارك الأبعاد الخارجية للغسالة وتصميمها لأن في غسالات تصميمها كيرفي وضخم من الجنب او الامام.
وعشان تكون في الامان قيس فتحات الأبواب والممرات اللي هتستخدمها وانت بتدخل الغسالة عشان متتفاجأش وتعرف ان كانت هتعدي من الممرات والابواب دي ولا لأ.
7. هل المسحوق بس هو المنظف للغسالة؟
تقدر تختار مسحوق أو جل أو سائل. ميزة المنظف الجل والسائل انه بيذوب بسهولة في دورات الغسيل المنخفضة الحرارة
