لحظات السعادة مش لازم تكون كبيرة ممكن تكون في فيلم حلو، قاعدة في البلكونة ، كوباية قهوة الصبح بدري وأغنية لفيروز ،  خروجة حلوة مع أصحابك ولمة عيلة أو حتى يوم أجازة من الشغل

وأكيد بنتبسط كلنا من أكلة حلوة

الأكل دا من أهم متع الحياة اللي كلنا بنستمع بيها .في ناس أكيلة وناس نفسها حلوة أقل أكلة ترضيها وفي اللي بيحب يدوق بس ما ياكلش كتير وفي اللي مايعجبوش غير الأكل اللي يتعمل على مزاجه. يمكن عشان كدة الدايت أوقات كتير بيغلبنا بالذات أنه صعب نلتزم بيه فترة طويلة.

البوست دا حنتكلم فيه عن طرق بسيطة وخطوات سهلة ممكن تطبقها عشان تحافظ على وزنك وصحتك سواء بتعمل دايت أو ممشيها بالبركة النصائح دي مفيدة ليك

 هدفك لازم يكون أكبر من أنك تخس لأن في مليون دايت ممكن يخليك تخس بس أكيد مش هتقدر تكمل عليه باقي حياتك لأن بطبيعتنا بنحب ناكل كل حاجة فهترجع تزيد تاني بعد فترة. لكن لو حطيت هدف كبير حماسي زي أنك عايز تحافظ على صحتك وتهتم بشكل جسمك هيديك دافع على طول أنك متلخبطش في الأكل حتى لما تبطل دايت.

خلاصة ال 14 نصيحة في: الأكل الصحي، المياه، والعصير الفريش والرياضة

يلا نبتدي؟

الأكل الصحي

1. ركز وانت بتاكل ، استمتع بالأكل بالراحة مش بالكمية خد بالك متكلش بسرعة وامضغ كويس مش ضروري وانت بتاكل متتكلمش بالعكس ادي لنفسك فرصة تبطأ أول ما تبتدي تحس أنك بتشبع

2. خلي معظم الأكلات الثقيلة شوية الصبح

:ولو عليز تتعشي اتعشي خفيف مثلا ممكن تاكل

سلطة عليها صوص خفيف       

طبق فاكهة بالزبادي

شوفان بالعسل

شوربة . شوف انت بتحب شوربة ايه واعملها (بروكلي ، جزر ، قرع، مشروم) طيب ازاي تخليها زي الكريمة شبه اللي في المطاعم؟ اضربها بالهاند بليندر

3. خد أكل معاك الشغل وقلل الأكل من برا. من غير ما تغلب نفسك لانش بوكس وحط فيه فاكهة متقطعة وتوست بني عليه شيدر وturkey مدخن. أهم حاجة تضبطه ويكون كريسبي من بره بعد ما تعمل الساندويتش حطه في الساندويتش مايكر أو حمص العيش في التوستر . وتاني ماتنساش الفاكهة

4. الناس اللي بتحب تاكل حاجات خفيفة بين الوجبات حضروا سناكس صحية وحطوها في الثلاجة يا ريت نجهز كميات من الخضار والفاكهة وبالكيتشن ماشيين نقطع شرائح بالحجم المناسب. الموضوع ده مهم جدا عشان لما بنجوع بين الوجبات بنبقى عايزيين حاجة سريعة وممكن نستسهل فناكل أي حاجة حتي لو فيها حاجة فيها دهون وسكريات.

5. طب والناس اللي مش بتحب الخضار بس عايزه تاكل بين الوجبات ونفسها تستفيد من الخضروات تعمل ايه؟ ممكن تغمسها بزبادي بالثوم أو صوص حمص بس يتعمل في البيت في الكبة عشان تضمن ما يكونش فيه دهون كتير حيغير طعم الخضار 

6. جرب تطبخ أكلك بنفسك. حتتحكم في الطعم والدهون وتبقى عارف انت كلت ايه بالضبط. في حاجات بسيطة جدا تسهل عليك الطبخ زي مثلا حلة البخار(food steamer)، والقلاية من غير زيت(air fryer) و حلة تسوية الرز (rice cooker)

7. نحضر غدا الأسبوع ونحطه في الفريزر عشان الطبخ في نصف الأسبوع متعب جدا خصوصا مع المدارس والشغل وده غالبا اللي بيخلينا نستسهل نعمل مكرونة وفراخ بانيه. التحضير من بدري مريح ومش محتاجين نعمل حاجة غير نسخن الأكل في المايكروويف

8. طب نعمل ايه في الرز والمكرونة؟ من غير ما نحرم نفسنا منهم خالص الموضوع بسيط نقلل منهم على قد ما نقدر وناكل الرز والمكرونة البني زي فكرة التوست البني بالضبط، أفيد وبيشبعوا جدا.

ونقلل الزيت والزبدة يعني مثلا الرز بدل ما تطبخه على النار بالزيت أو السمنة اعمله في  Rice cookerحلة تسوية الرز من غير ولا نقطة دهون ويطلع مفلفل وطعمه حلو

9. طبعا البروتين مهم جدا عشان العناصر الغذائية وبيشبعك لفترة طويلة ممكن تجدد الطريقة اللي بتطبخ بيها اللحمة أو الفراخ أو السي فود تبلهم وعلى الشواية على طول أو ال Air fryer

10. أحسب عدد السعرات في وجباتك متستصعبوش عشان في كذا أبليكيشن هتقولك عدد السعرات في كل أكلة لو جبت ميزان مطبخ هيسهل عليك جدا هتتحكم وتأخذ بالك من كميات كل حاجة

المشروبات

11.بدل مشروبات الغازية والعصائر الجاهزة بعصائر فريش وسموذي الفواكة أو الميلك شيك اللي مليانيين بالفيتامينات اعمله في البيت بعصارة أوخلاط أولا أفيد وسكر أقل ومن غير مواد حافظة و أكيد أرخص.

المياه

 

12.لازم تحب شرب المياه عشان بتساعد على  حرق الدهون ، وبتعلي التركيز وبتحسن البشرة وبتنظم الهضم ، وبتحافظ على طاقتك البدنية وبتضبط مودك. مينفعش تطنش المياه نهائي ولو بتزهق منها ممكن  تقطع شرائح ليمون أو برتقال معاها أو ضيف نقطتين مياه زهر أو ورد تغير طعم المياه وتخليها فريش. عشان متنساش تشرب أملأ ازازة مياه من الديسبنسر و حطها قدامك وهتلاقي نفسك بشرب أكتر من الأول.


التمرين



13. اتمرن مش عشان تبقى فورمة بس اتمرن عشان صحتك تبقى كويسة تزود معدل الحرق، خلي التمرين مش شوية وقت في الجيم مع أوزان ومزيكا عالية وبس أو جري على المشاية لحد ما تزهق. الرياضة ممتعة جدا لأنك بتحس بقوة جسمك ومرونتك . جرب كلاسات يوجا، أو سبينج أو كروس فيت أو زومباواللي مالوش في الجيم ننزل من البيت نأخد سماعاتنا و نتمشى أو نجري مع playlist  للمشي أو الجري

معندكش مكان تتمشى فيه؟ يبقى لازم تجيب مشاية في البيت. شغل التلفزيون وانت بتتمشى عشان متزهقش

14.أهم حاجة في التمرين أنك تحس بكل لحظة وتستمع بيها حس بمجهودك وتعبك وأنت بتزق نفسك للأحسن وتنتصر على الكسل و تطلع برا الcomfort zone متشغلش بالك امتى هتخلص التمرين دي اللحظات اللي تسقف فعلا فيها لنفسك وقدر نفسك عشان مجهودك والتزامك بيعملوا كل الفرق